Genevière DELEZOIDE, textes

 

Geneviève DELEZOIDE

Geneviève DELEZOIDE, d'Eperlecques, entrée à l'association en 1989 :

repas-apa-2009-bis-011.jpg

Histoires d'oujèowes :

Ech' cat houant :

      Y a-t-y quique chose ed plus canulèanwe qu'in cat houant qui cante èl' sérénade dévant vous fenette ? Os êtes là dins vous lit bien au cauwe, el' tête sus vou cavet prêt à vous indormir, et qu'i gèle à pierre finde inn'deur ?

     Ché qu'os faites ? Bin, os vous lévez pour l'incacher, sins prinde èl' temps d' mette vou caracowe... Cha, ch'est cacher misère, énonwe !

     Cha n' manque pont ! Os attrapez chelle chifarnaïe ! Os avez bieuwe cafouiller ind'zous d' ches couvertes pour cacher l' caleur....

     In plusse, chelle candilllette qu'alle a tombaïe dins vous dos, alle queminche à fonde et ch' cat houant i cante toudis...

     Ed'man.ye, cha s'ra l' cataplasse, èch' grog à l' castonade et batte èl' burre et arlaveuwe chel chéran.ne ! Tout cha à cause d'èch' salouperie d' cat houant !

     Pitite cause, grands effets !

Chelle cornale :


     Ch'étot ti sus in quêne, ch'étot ti sus in hête qu'alle étot chelle cornale ? Cha, je n' pourros pont vous l'dire ! Tout c' que j' saye, ch'est qu'd'èl' branque d'où qu'alle étot perchaye, alle ravisot in bout d' fichelle qui barloquot dévant sin bec ; sus chelle fichelle, i y avot du maïs intortilleye.

     Cha li faijot rud'mint invie... Alle levot in.ne patte pis l'aute, alle gonfflot ses plumes, mais a s' méfiot (ch'étot in.ne vièle cornal et alle connaissot ches hon.mes) ; alle dijot in elle min.me : "j' vaye pont chi gobeuwe l' bouillon pour in malhéreuwe grain d' maïs."

     Et quand alle a vu Florimond à l'affut aveuc sin viux fusique, alle a tournaye sin cul et, hop ! alle est partie. Florimond i n'a min.me pont euwe l' temps d'èl' vir.

     Bah ! Du bouillon d' cornale cha dot pont ête fameuwe ! Cha s'ra pour in aute coup !!!

Ches oujèonwes :


     Dins l' temps, j'allos à camp aveuc mes oujèonwes. J'avos in.ne cachoire et min quien comme assistant. Ch'ti-lale quand i voïot in bousa ou in.ne bête créveye, i manquot pont d'ès' trondleuwe èd-dins, pindant qu' mes oujèonwes is s'in mettotent plan.ye lu panche.

     Ej' mingeos in.ne tranche èd' routi aveuc in verre èd' chite ; cha m' sannot bon.

     In;ne foye, des jon.nes hon.mes incrunqués sus in engin qu'is avotent bastiquéye euwes min.mes, suppose, is féjoitent la coiurse dins chelle reulette à côteye. Is m'ont demandaye si j'avos pont des dries pouir arringer lu machine. Mi, j'aye pont beson d' cha pour sogner des oujèonwes, énonwe ? Ch'est c' que j' lu z'aye dit. Alors, i n' a un (on érot dit qu'i avot l' rouvi tellemint qu'i étot rouge) qui n'avont pont l'air contint du tout.

     Alors, ché qu' j'aye fait ? J'aye invoié min quien et mes oujèonwes à la charge ; os les érêtes vu détaleuwe ; èj' n'in rios core huit jours après.                                                                                                

 Pour tout comprinde :

- cat houant : chat huant.

- cavet : oreiller

- l'incacher : le chasser

- caracowe : corsage

- chifarnaïe : gros rhume

- cacher : chercher

- candillette : petite stalagtite de glace

- castonade : cassonade

- chéran.ne : instrument pour battre le beurre.

- cornale : corneille.

- ravisot : regardait

- barloquot : bougeait

- gobeuwe l' bouillon : tomber

- fusique : fusil

- oujèonwes : oies

- cachoire : fouet

- bousa : bouse

- s' trondleuwe : se rouler

- sannot : semblait

- incrunqués : montés

- bastiquéye : fabriqué

- reulette : ruelle

- dries : petit clou de cordonnier à quatre pointes.

- rouviu : rougeole.  

numerisation0001.jpg

numerisation0002.jpg

In 1991, à in.ne réunièonwe d'ches viux, Geneviève Delezoïde et Roland Dussaussoy is jutent "L' capièowe d' Estéphanie", in.ne pièche èd' Roland Dussaussoy qui vo être armaniéïe pour èd'vénir "On n' vo pont ichi s' capigner !" ; à Eperlecques, i aurouait bétôt fallu qu'on queuminche par la fin.ye pour aller pus vite, vu qu' ches viux is n'attindouatent qu'in.ne chose : qu'on s'in vache pour èwes juer à cartes.... Des malhonnêtes quand min.me, après nous avoir invitèïes...

Ajouter un commentaire

Vous utilisez un logiciel de type AdBlock, qui bloque le service de captchas publicitaires utilisé sur ce site. Pour pouvoir envoyer votre message, désactivez Adblock.

Créer un site gratuit avec e-monsite - Signaler un contenu illicite sur ce site

×